മെല്ബണ് / വാഷിംഗ്ടണ്: വിദേശ രാജ്യങ്ങളില് സ്ഥിരതാമസമാക്കാനും പൗരത്വം (Citizenship) സ്വന്തമാക്കാനും ആഗ്രഹിക്കുന്ന കുടിയേറ്റക്കാര്ക്ക് മുന്നില് നിയമങ്ങള് കടുപ്പിച്ച് ഓസ്ട്രേലിയയും അമേരിക്കയും. പൗരത്വത്തിന് അപേക്ഷിക്കുന്നതിന് മുന്പുള്ള വര്ഷങ്ങളില് സ്വന്തം നാട്ടിലേക്കോ മറ്റ് രാജ്യങ്ങളിലേക്കോ നടത്തുന്ന യാത്രകള്ക്ക് കൃത്യമായ സമയപരിധി നിശ്ചയിച്ചുകൊണ്ടാണ് ഇരു രാജ്യങ്ങളും പുതിയ മാര്ഗ്ഗനിര്ദ്ദേശങ്ങള് പുറത്തിറക്കിയിരിക്കുന്നത്. നിശ്ചിത ദിവസങ്ങളില് കൂടുതല് രാജ്യത്തിന് പുറത്തു തങ്ങിയാല് പൗരത്വ അപേക്ഷകള് തള്ളിക്കളയുമെന്നാണ് മുന്നറിയിപ്പ്.
ഓസ്ട്രേലിയയിലും അമേരിക്കയിലുമുള്ള ലക്ഷക്കണക്കിന് പ്രവാസി മലയാളികളെ നേരിട്ട് ബാധിക്കുന്ന ഈ സുപ്രധാന മാറ്റങ്ങള് താഴെ പറയുന്നവയാണ്:
1. ഓസ്ട്രേലിയന് പൗരത്വം: അവസാന വര്ഷത്തെ 90 ദിവസത്തെ പരിധി നിര്ണ്ണായകം
ഓസ്ട്രേലിയന് ഡിപ്പാര്ട്ട്മെന്റ് ഓഫ് ഹോം അഫയേഴ്സ് പുറത്തുവിട്ട പുതിയ മാര്ഗ്ഗനിര്ദ്ദേശങ്ങള് പ്രകാരം പൗരത്വത്തിന് അപേക്ഷിക്കുന്നവര് താഴെ പറയുന്ന മൂന്ന് പ്രധാന നിബന്ധനകള് നിര്ബന്ധമായും പാലിച്ചിരിക്കണം:
നാല് വര്ഷത്തെ തുടര്ച്ചയായ താമസം: അപേക്ഷ സമര്പ്പിക്കുന്ന തീയതിക്ക് തൊട്ടുമുമ്പുള്ള നാല് വര്ഷം സാധുതയുള്ള വിസയില് ഓസ്ട്രേലിയയില് താമസിച്ചവര്ക്ക് മാത്രമേ പൗരത്വത്തിന് അര്ഹതയുള്ളൂ. ഈ നാല് വര്ഷത്തിനിടയില് ആകെ 12 മാസത്തില് കൂടുതല് സമയം രാജ്യത്തിന് പുറത്ത് ചെലവഴിക്കാന് പാടില്ല.
അവസാന 12 മാസത്തെ കര്ശന നിയന്ത്രണം: പൗരത്വത്തിന് അപേക്ഷിക്കുന്നതിന് തൊട്ടുമുമ്പുള്ള ഒരു വര്ഷം പെര്മനന്റ് റെസിഡന്റ് (PR) വിസയോ സ്പെഷ്യല് കാറ്റഗറി വിസയോ (SCV) ഉണ്ടായിരിക്കണം. ഈ അവസാന ഒരു വര്ഷത്തിനിടെ ആകെ 90 ദിവസത്തില് കൂടുതല് ഓസ്ട്രേലിയയ്ക്ക് പുറത്ത് തങ്ങിയാല് അപേക്ഷ നിരസിക്കപ്പെടും. നാല് വര്ഷത്തെ മൊത്തം കണക്കില് ഇളവുണ്ടെങ്കില് പോലും അവസാന വര്ഷത്തെ ഈ 90 ദിവസത്തെ പരിധി ലംഘിക്കാന് പാടില്ല.
കുട്ടികള്ക്കുള്ള ഇളവുകള്: 16 വയസ്സില് താഴെയുള്ള കുട്ടികളെ പൊതുവായ താമസ നിബന്ധനകളില് നിന്ന് ഒഴിവാക്കിയിട്ടുണ്ടെങ്കിലും അവര്ക്ക് പെര്മനന്റ് റെസിഡന്റ് പദവി ഉണ്ടായിരിക്കണം. കൂടാതെ ഓസ്ട്രേലിയ വിടുന്നതിന് തൊട്ടുമുമ്പ് എസ്.സി.വി (SCV) ഉള്ളവരെ വിദേശത്തായിരിക്കുന്ന സമയത്തും പെര്മനന്റ് റെസിഡന്റുകളായി തന്നെ കണക്കാക്കും.
മുകളില് പറഞ്ഞ നിബന്ധനകള് പാലിക്കാത്തവര് എത്ര വര്ഷം ഓസ്ട്രേലിയയില് ജീവിച്ചവരായാലും പൗരത്വത്തിന് അര്ഹരായിരിക്കില്ല എന്ന് മന്ത്രാലയം കര്ശനമായി വ്യക്തമാക്കിയിട്ടുണ്ട്.
2. അമേരിക്കന് പൗരത്വം (US Citizenship): ഗ്രീന് കാര്ഡ് ഉടമകള് ശ്രദ്ധിക്കേണ്ട കാര്യങ്ങള്
അമേരിക്കയില് ഗ്രീന് കാര്ഡ് സ്വന്തമാക്കിയ വിദേശികള്ക്ക് പൗരത്വം നേടുന്നതിനുള്ള യാത്രാ~താമസ നിബന്ധനകള് യു.എസ് സര്ക്കാരും ശക്തമാക്കിയിട്ടുണ്ട്:
5 വര്ഷത്തെ താമസവും ശാരീരിക സാന്നിധ്യവും: ഇമിഗ്രേഷന് ആക്ട് അനുസരിച്ച് ഗ്രീന് കാര്ഡ് ലഭിച്ച ശേഷം കുറഞ്ഞത് അഞ്ച് വര്ഷമെങ്കിലും തുടര്ച്ചയായി അമേരിക്കയില് താമസിച്ചവര്ക്ക് മാത്രമേ പൗരത്വത്തിന് അപേക്ഷിക്കാനാകൂ. ഇതില് കുറഞ്ഞത് രണ്ടര വര്ഷമെങ്കിലും (30 മാസം) അപേക്ഷകര് ഭൗതികമായി അമേരിക്കയ്ക്കുള്ളില് തന്നെ ഉണ്ടായിരിക്കണം.
ആറ് മാസത്തില് കൂടുതല് വിദേശത്ത് തങ്ങിയാല് കുരുക്ക്: തുടര്ച്ചയായി ആറ് മാസത്തില് കൂടുതലും ഒരു വര്ഷത്തില് താഴെയും സമയം അമേരിക്കയ്ക്ക് പുറത്ത് തങ്ങിയാല് 'തുടര്ച്ചയായ താമസം' (Continuous Residence) ലംഘിച്ചതായി കണക്കാക്കും. അമേരിക്കയിലെ താമസം ഉപേക്ഷിച്ചിട്ടില്ലെന്ന് വ്യക്തമായ തെളിവുകളോടെ അധികൃതരെ ബോധ്യപ്പെടുത്തിയാല് മാത്രമേ ഇവര്ക്ക് ഇളവ് ലഭിക്കൂ.
ഒരു വര്ഷം പുറത്തുനിന്നാല് എല്ലാം ആദ്യം മുതല്! ഗ്രീന് കാര്ഡ് ഉടമകള് തുടര്ച്ചയായി ഒരു വര്ഷമോ അതില് കൂടുതലോ അമേരിക്കയ്ക്ക് പുറത്ത് കഴിഞ്ഞാല് പൗരത്വത്തിനായുള്ള കാത്തിരിപ്പ് സമയം പൂജ്യത്തില് നിന്ന് (ആദ്യ തീയതി മുതല്) വീണ്ടും എണ്ണേണ്ടി വരും.
ജോലി സംബന്ധമായ ഇളവുകള്: യു.എസ് സര്ക്കാരിന്റെയോ അംഗീകൃത അമേരിക്കന് ഗവേഷണ സ്ഥാപനങ്ങളുടെയോ അമേരിക്കന് കമ്പനികളുടെയോ ആവശ്യത്തിനായി വിദേശത്ത് ജോലി ചെയ്യുന്നവര്ക്ക് യാത്രാ പരിധിയില് ഇളവുണ്ട്. എന്നാല് ഇവര് ഗ്രീന് കാര്ഡ് ലഭിച്ച ശേഷം കുറഞ്ഞത് ഒരു വര്ഷമെങ്കിലും തുടര്ച്ചയായി യു.എസില് താമസിച്ചിരിക്കണമെന്നും വിദേശയാത്രയെക്കുറിച്ച് മുന്കൂട്ടി അധികൃതരെ അറിയിക്കണമെന്നും വ്യവസ്ഥയുണ്ട്.
നീണ്ട അവധിക്കായി നാട്ടിലേക്ക് പോകുന്ന പ്രവാസി മലയാളികള് തങ്ങളുടെ പൗരത്വ അപേക്ഷകളെ ബാധിക്കാത്ത രീതിയില് യാത്രകള് ക്രമീകരിക്കാന് പ്രത്യേകം ശ്രദ്ധിക്കുക.

Comments: